Bahay-bahayan
Ang kanyang maliit na bahay-bahayan
Ay isang pasyalan ng mga turista.
Naroon ang silid na kanyang kanlungan:
Isang palaruang mayroong camera.
Siya ay prinsesang t’wina’y dinadalaw
Ng mga prinsipeng may pílyong layunin.
Kapag sa bintana, sila’y dumudungaw
Ay nag-uumpisa ang kanyang gawain.
Kahit ang prinsesa’y may gatas sa labi,
S’ya’y mahusay na ring maghanda’t magluto.
Sa kanyang bisita, ang hain n’ya lagi
Ay luto ng Diyos na lasa’y di biro.
“Ito’y laro lamang,” sa kanya’y pahayág
Ng hari at reynang may-ari ng silid.
Ang tangi n’yang hangad: siya’y makalabas
Sa bahay-bahayang may larong malupit.
Bago pa man dumating ang pandaigdigang pandemya ng COVID-19, mataas na ang insidente ng online na pang-aabusong sekswal sa mga bata. At dito sa ating bansa, mismong sariling mga kamag-anak pa ang nagpapasimuno ng ganitong hindi makataong gawain. Lalo pa itong pinalala ng lockdown.
Nakikiisa ang Sulat Kamay sa mga panawagan ng iba’t ibang sektor na wakasan na ang ganitong pagtrato sa mga bata.
Royalty Free Image From Needpix.com Child Abuse Fear
Kung nagustuhan mo ang akdang ito, pakape ka naman!
I-click lamang ang button sa ilalim para magpadala ng kape sa manunulat. Kung walang button na lumabas ay magtungo lamang sa aming Shop page.
Kasalukuyang online writer para sa sandamakmak na business websites sa loob at labas ng Pilipinas. Siya ang tumatayong Editor ng ExpertContentWritersTeam - isang pangkat ng mga freelance writers. Naging tagapangulo ng Kataga, Samahan ng mga Manunulat sa Pilipinas, Inc.
Nagwagi siya sa dalawang timpalak na kapwa pinasimulan ng Komisyon sa Wikang Filipino (KWF) - Tumula Tayo 2022, kategoryang Tanaga (Ikalawang Gantimpala) at Dula Tayo: Pagsulat ng Dramatikong Monologo (Ikalawang Gantimpala). Muli siyang nagwagi sa mga kategoryang Diyona, Tanaga, at Dalit sa Tula Tayo 2023.
Noong 2024, pitong beses siyang nagwagi sa Tula Tayo (anim na diyona, isang tanaga) sa KWF, at dalawang beses naman sa Saranggola Blog Awards (Unang Karangalan sa Kuwentong Pambata at Ikalawang Karangalan sa Tula).
Samantala, ilan sa kaniyang mga akda ay nalimbag sa Points of Contact ng Philippine Collegian, Palihang Rogelio Sicat: Unang Antolohiya, at Ani Journal, Vol 42 ng Cultural Center of the Philippines.
Kapag may oras ay muli siyang nagbabalik sa pag-compose ng mga kanta.
- Ang K’wento ni T’nalie* - November 15, 2024
- Sa Bubóng ng Pag-asa - November 15, 2024
- Eklipse - November 10, 2022