Haibun ng Tagumpay
Sa lahat ng bagay na naganap sa Pilipinas mula sa pananakop sa WPS, sa illegal migrants at drogang mula sa China,
hanggang sa pag-abandona at pag-aakusa sa mga tripulante ng nabanggang F/B Gem-Ver, sinong mag-aakalang
makukuha natin ang pagkapanalong minimithi sa anyo ng larong basketball?
Pag-asa’y parang bola:
agawi’t, tumalbog man
sa kapapasa-pasa,
lalo lang aabangan.
At ito na nga ang Gilas Youth. Parang langgam na kumagat at nagpatumba sa higanteng tipaklong. Hindi kilalang
koponan kaya hindi masyadong nabalitaan ang pagkapanalo. Sa score na 86-72, kahit paano’y naipaghiganti ang
mga nasirang bahura. Kahit paano’y nabawi ang dangal ng mga inaping mangingisda. Sana’y humawa ang kanilang
tagumpay maging sa mga isyung panlipunang kinakaharap natin ngayon. Sana’y kahit sa basketball, makita ng
madlang walang malaking nakapupuwing at walang maliit na nakahihirin, lalo na’t sa panahon ngayong
pinapanginoon ng sarili nating pinuno ang mananakop na dragon.
Ang haibun ay isang uri ng panulaang Hapones kung saan magkalangkap ang prosa at maikling tula.
Public Domain Image Basketball Shadow
Kasalukuyang online writer para sa sandamakmak na business websites sa loob at labas ng Pilipinas. Siya ang tumatayong Editor ng ExpertContentWritersTeam - isang pangkat ng mga freelance writers. Naging tagapangulo ng Kataga, Samahan ng mga Manunulat sa Pilipinas, Inc.
Nagwagi siya sa dalawang timpalak na kapwa pinasimulan ng Komisyon sa Wikang Filipino (KWF) - Tumula Tayo 2022, kategoryang Tanaga (Ikalawang Gantimpala) at Dula Tayo: Pagsulat ng Dramatikong Monologo (Ikalawang Gantimpala). Muli siyang nagwagi sa mga kategoryang Diyona, Tanaga, at Dalit sa Tula Tayo 2023.
Noong 2024, pitong beses siyang nagwagi sa Tula Tayo (anim na diyona, isang tanaga) sa KWF, at dalawang beses naman sa Saranggola Blog Awards (Unang Karangalan sa Kuwentong Pambata at Ikalawang Karangalan sa Tula).
Samantala, ilan sa kaniyang mga akda ay nalimbag sa Points of Contact ng Philippine Collegian, Palihang Rogelio Sicat: Unang Antolohiya, at Ani Journal, Vol 42 ng Cultural Center of the Philippines.
Kapag may oras ay muli siyang nagbabalik sa pag-compose ng mga kanta.
- Ang K’wento ni T’nalie* - November 15, 2024
- Sa Bubóng ng Pag-asa - November 15, 2024
- Eklipse - November 10, 2022