Magic

Ang pagtatagpo nati’y mahiwaga;

isang munting kababalaghang

‘di madalumat ng isipan.

Para kasing sa dinami-rami

ng manonood ng iyong palabas,

bukod tanging ako ang pinalad

na ilagay mo sa iyong tabi.

At nagsimula ang pagtatanghal

sa tunog ng masigabong palakpakan.

Ako’y pinalutang mo sa hangin –

pinasakay, pinaikot

itinali at ibinitin,

pinagpira-piraso

at saka pinulbos.

Ngunit ang paborito kong ginawa mo

matapos mamangha nang wagas:

naglaho kang parang bula –

walang iniwang anumang bakas,

kundi isang patak ng luha.

Public Domain Image Magic Wand Female Flying

Author
Recent Posts

Ferdie L. Eusebio

Musikero, makata, mangingibig, at driver; si Ferdie Eusebio ay isinilang at nagkukuta sa Los Baños, Laguna. Kasalukuyang online writer para sa sandamakmak na business websites sa loob at labas ng Pilipinas. Siya ang tumatayong Editor ng ExpertContentWritersTeam - isang pangkat ng mga freelance writers. Naging tagapangulo ng Kataga, Samahan ng mga Manunulat sa Pilipinas, Inc.

Kamakailan ay nagwagi siya sa dalawang timpalak na kapwa pinasimulan ng Komisyon sa Wikang Filipino (KWF) - Tumula Tayo 2022, kategoryang Tanaga (Ikalawang Gantimpala) at Dula Tayo: Pagsulat ng Dramatikong Monologo (Ikalawang Gantimpala).

Kapag may oras ay muli siyang nagbabalik sa pag-compose ng mga kanta.

Latest posts by Ferdie L. Eusebio (see all)