Sa Tuwing Sasakmalin Ng Dilim Ang Bukirin

Sa Tuwing Sasakmalin Ng Dilim Ang Bukirin

At sumasalakay sila sa karimlan ng gabi.

Pusikit pang nababalot ng dilim ang bukirin

Tuwing sila’y dumarating, walang abiso o pasabi.

 

Tila mga anay silang humahanay sa bawat baging,

Tangkay, dahon at bunga – matiyagang naghuhukay,

Naghuhukay nang naghuhukay sa pakay na kunin.

 

Kapag pumupulandit naman ang ilaw sa kalayuan

Sila ay magsisidapaan na para bang mga ahas;

Gagapang sa sukal upang hindi sila matanaw

 

Ng sinumang sa gabi ay nagmamatyag.

Ayaw na ayaw nilang may sinumang makasisilip

Ng kanilang tunay na anyo. Baka nga malantad

 

Sa buong lupain ang hitsura nilang marungis.

Kaya sila ay nananalangin kahit nagkakasala

Na huwag sanang madapuan ng mabangis na titig.

 

At kapag tapos na, ititindig nilang parang bandila

Ang mga tangkay na kinunan ng bungang-lupang pinuti;

Gagawin nila ito upang ang mga bakas ay ‘di mahalata.

 

At sumasalakay sila sa karimlan ng gabi

Habang himbing na himbing ang may-ari ng bukiring

Pinagnanakawan na ay hindi pa masabi.

 

Public Domain Image Thief Night
Ferdie L. Eusebio
Latest posts by Ferdie L. Eusebio (see all)


Leave a Reply