Magic
Ang pagtatagpo nati’y mahiwaga;
isang munting kababalaghang
‘di madalumat ng isipan.
Para kasing sa dinami-rami
ng manonood ng iyong palabas,
bukod tanging ako ang pinalad
na ilagay mo sa iyong tabi.
At nagsimula ang pagtatanghal
sa tunog ng masigabong palakpakan.
Ako’y pinalutang mo sa hangin –
pinasakay, pinaikot
itinali at ibinitin,
pinagpira-piraso
at saka pinulbos.
Ngunit ang paborito kong ginawa mo
matapos mamangha nang wagas:
naglaho kang parang bula –
walang iniwang anumang bakas,
kundi isang patak ng luha.
Public Domain Image Magic Wand Female Flying
Musikero, makata, mangingibig, at driver; si Ferdie Eusebio ay isinilang at nagkukuta sa Los Baños, Laguna. Kasalukuyang online writer para sa sandamakmak na business websites sa loob at labas ng Pilipinas. Siya ang tumatayong Editor ng ExpertContentWritersTeam - isang pangkat ng mga freelance writers. Siya rin ay kasalukuyang taga-pangulo ng KATAGA-Laguna (KaLag). Kapag may oras ay muli siyang nagbabalik sa pag-compose ng mga kanta.
Latest posts by Ferdie L. Eusebio (see all)
- Bahay-bahayan - July 26, 2020
- ‘Sang Gabi Ng Lockdown - July 24, 2020
- Gitara - July 24, 2020