Ang Pusa Sa Kandungan Ni Sisa

Kung kaya ko lamang damahin ang sakit

Ng bawat kulata, suntok at sabunot

Ng iyong kabiyak – pati na ang galit

Ay ‘di mo na sana ipanghihilamos

Sa mukhang marikit ang patak ng luha.

Ang kaya ko lamang sa ngayon ay pilit

ikalmot nang husay ang kukong matulis.

Kung alam ko lamang gawan ng paraan

Na aking maibsan ang iyong hinagpis,

Sa tuwing susuong ang iyong panganay

At bunsong magiliw tungo sa panganib

Ay aking gagawin nang ika’y matuwa.

Puwede na kayang isiksik ko na lang

sa iyong kandungan ang aking katawan?

Ngunit ‘di pa uso ang gano’ng sistema

At hindi ganito ang tunay na buhay.

Bagkos ay palaging ang iyong kasama

Ay isang mumunting alaga sa bahay

Na siyang karamay t’wing ika’y balisa.

Ang init ng lambing ay sasapat na bang

kapalit ng yakap ng anak mong dal’wa?

Ang iyong paghimas sa aking gulugod

Ay s’ya mong libangan matapos makuha

Ng iyong asawa ang nais n’yang lubos.

Ang haplos mo naman sa munti kong tenga,

Pantanggal pangamba sa supling mong mutya.

Ang mukha ko’t buntot ay sadyang ‘kinuskos

upang mapawi na ang kimkim mong lungkot.

Tahimik na saksi sa dilim ng gabi

Ang aking matalim na matang kay bilog.

At habang lulong ka sa iyong sarili

Tanong ko’y palaging matindi’t marubdob:

Dinaranas mo ba’y tapos na nga kaya?

Ang iyong pasakit ay sadyang kaytindi

banayad kong ngiyaw ay ‘di mo intindi.

Ferdie L. Eusebio

Musikero, makata, mangingibig, at driver; si Ferdie Eusebio ay isinilang at nagkukuta sa Los Baños, Laguna. Kasalukuyang online writer para sa sandamakmak na business websites sa loob at labas ng Pilipinas. Siya ang tumatayong Editor ng ExpertContentWritersTeam - isang pangkat ng mga freelance writers. Siya rin ay kasalukuyang taga-pangulo ng KATAGA.

Kamakailan ay nagwagi siya sa dalawang timpalak na kapwa pinasimulan ng Komisyon sa Wikang Filipino (KWF) - Tumula Tayo 2022, kategoryang Tanaga (Ikalawang Gantimpala) at Dula Tayo: Pagsulat ng Dramatikong Monologo (Ikalawang Gantimpala).

Kapag may oras ay muli siyang nagbabalik sa pag-compose ng mga kanta.

Latest posts by Ferdie L. Eusebio (see all)