Gapasan

Hindi na nga palay ang itinatanim

Sa ‘ting natutuyong mumunting bukirin

Walang ibang punlang tutubo marahil

Kundi droga, bala, at lagim ng baril.

Paglao’y yayabong ang punlang hinasik

Na para bang kamay na saklot ang langit;

Ang samyo ng bunga, dugo ang kawangis

Na s’ya ring pandilig ‘pag nasok sa isip.

Ang binhing ‘tinanim pagdating ng taon

Ay s’yang aanihin sa lungsod at nayon

Ang gutom ng madla kung magkakagayon

Ay punglong wawakas sa buhay at nasyon.

At bago kumalat ang punlang nadatnan

Ay dapat wakasan ang pinanggalingan

Hasain ang tabak, talim ay ilaan

Ang oras ay tiyak; ngayon ang gapasan!

Ferdie L. Eusebio

Musikero, makata, mangingibig, at driver; si Ferdie Eusebio ay isinilang at nagkukuta sa Los Baños, Laguna.

Kasalukuyang online writer para sa sandamakmak na business websites sa loob at labas ng Pilipinas. Siya ang tumatayong Editor ng ExpertContentWritersTeam - isang pangkat ng mga freelance writers. Naging tagapangulo ng Kataga, Samahan ng mga Manunulat sa Pilipinas, Inc.

Nagwagi siya sa dalawang timpalak na kapwa pinasimulan ng Komisyon sa Wikang Filipino (KWF) - Tumula Tayo 2022, kategoryang Tanaga (Ikalawang Gantimpala) at Dula Tayo: Pagsulat ng Dramatikong Monologo (Ikalawang Gantimpala). Muli siyang nagwagi sa mga kategoryang Diyona, Tanaga, at Dalit sa Tula Tayo 2023.

Noong 2024, pitong beses siyang nagwagi sa Tula Tayo (anim na diyona, isang tanaga) sa KWF, at dalawang beses naman sa Saranggola Blog Awards (Unang Karangalan sa Kuwentong Pambata at Ikalawang Karangalan sa Tula).

Samantala, ilan sa kaniyang mga akda ay nalimbag sa Points of Contact ng Philippine Collegian, Palihang Rogelio Sicat: Unang Antolohiya, at Ani Journal, Vol 42 ng Cultural Center of the Philippines.

Kapag may oras ay muli siyang nagbabalik sa pag-compose ng mga kanta.

Latest posts by Ferdie L. Eusebio (see all)