Muning, muning

Huwag kang masasanay

na magmasid lamang sa itaas

o sa sahig ay mahiga at mag-unat.

Muning, muning

Huwag mamihasang mag-abang

Sa among nagbibigay ng biyaya

dahil ‘di ka nilikha para maging alaga.

Ugaliin mong mag-usisa

siyasatin ang mga lungga

saliksikin ang mga siwang

busisiin ang mga puwang

akyatin ang mga harang

gibain ang mga hadlang

Dahil hindi lang mga daga

ang makikita mo sa butas

Naroroon din ang hiwaga

at kapanapanabik na bukas!

Muning, muning

Bumangon ka at maglaro

Sanayin ang katawan, isip at puso

Upang paglaki ay ‘di ka mahapo!

Ferdie L. Eusebio

Musikero, makata, mangingibig, at driver; si Ferdie Eusebio ay isinilang at nagkukuta sa Los Baños, Laguna. Kasalukuyang online writer para sa sandamakmak na business websites sa loob at labas ng Pilipinas. Siya ang tumatayong Editor ng ExpertContentWritersTeam - isang pangkat ng mga freelance writers. Siya rin ay kasalukuyang taga-pangulo ng KATAGA.

Kamakailan ay nagwagi siya sa dalawang timpalak na kapwa pinasimulan ng Komisyon sa Wikang Filipino (KWF) - Tumula Tayo 2022, kategoryang Tanaga (Ikalawang Gantimpala) at Dula Tayo: Pagsulat ng Dramatikong Monologo (Ikalawang Gantimpala).

Kapag may oras ay muli siyang nagbabalik sa pag-compose ng mga kanta.

Latest posts by Ferdie L. Eusebio (see all)