Wala Nang Laman Ang Ating Mga Panaginip

Wala nang laman ang ating mga panaginip
pagkat maya’t maya na natin itong nasisilip.

Wala nang laman ang ating mga pangarap
dahil hindi na tayo marunong maghangad.

Hinahabol na natin ang digital at electronic
kahit bangungot na ang kanilang hinahatid.

Wala nang laman ang ating mga damdamin
pagkat kaydali lamang nating mahumaling.

Wala nang laman ang ating mga salita
dahil hindi na ito batid ng ating gunita.

Hinahangad na natin ang peke at synthetic
kahit bangungot na ang kanilang hinahatid.

Wala nang laman ang ating mga pangako
pagkat hindi na tapat ang ating mga puso.

Wala na ring tamis ang ating mga ngiti
dahil hungkag na ang ating mga budhi.

Inaasam na natin ang de-motor at plastic
kahit bangungot na ang kanilang hinahatid.

Wala nang laman ang ating mga panaginip
pagkat puso at isip nati’y digital, electronic
peke, synthetic, de-motor at plastic.

Ferdie L. Eusebio

Musikero, makata, mangingibig, at driver; si Ferdie Eusebio ay isinilang at nagkukuta sa Los Baños, Laguna. Kasalukuyang online writer para sa sandamakmak na business websites sa loob at labas ng Pilipinas. Siya ang tumatayong Editor ng ExpertContentWritersTeam - isang pangkat ng mga freelance writers. Siya rin ay kasalukuyang taga-pangulo ng KATAGA.

Kamakailan ay nagwagi siya sa dalawang timpalak na kapwa pinasimulan ng Komisyon sa Wikang Filipino (KWF) - Tumula Tayo 2022, kategoryang Tanaga (Ikalawang Gantimpala) at Dula Tayo: Pagsulat ng Dramatikong Monologo (Ikalawang Gantimpala).

Kapag may oras ay muli siyang nagbabalik sa pag-compose ng mga kanta.

Latest posts by Ferdie L. Eusebio (see all)