Bakit Di Mo Pangarapin

‘Wag na ‘wag mong pangaraping

Maging tulad ng bulaklak;

Pagkat kanyang ganda’t hinhin

Nakuha mong lahat-lahat.

At ‘wag mo ring pangaraping

Maging gaya nitong buwan;

Sa kanlungang papawirin,

S’ya’y mag-isa at malumbay.

Bakit ‘di mo pangaraping

Maging parang isang ibon?

Malaya n’yang nararating

Mga ulap na nagtipon.

Bakit ‘di mo pangaraping

Maging wangis ng ‘sang dagat?

Bawat alon n’yang magiting,

Buong mundo’y niyayakap.

Public Domain Image Crow Flying Bird Sun Dusk

Author
Recent Posts

Ferdie L. Eusebio

Musikero, makata, mangingibig, at driver; si Ferdie Eusebio ay isinilang at nagkukuta sa Los Baños, Laguna. Kasalukuyang online writer para sa sandamakmak na business websites sa loob at labas ng Pilipinas. Siya ang tumatayong Editor ng ExpertContentWritersTeam - isang pangkat ng mga freelance writers. Siya rin ay kasalukuyang taga-pangulo ng KATAGA.

Kamakailan ay nagwagi siya sa dalawang timpalak na kapwa pinasimulan ng Komisyon sa Wikang Filipino (KWF) - Tumula Tayo 2022, kategoryang Tanaga (Ikalawang Gantimpala) at Dula Tayo: Pagsulat ng Dramatikong Monologo (Ikalawang Gantimpala).

Kapag may oras ay muli siyang nagbabalik sa pag-compose ng mga kanta.

Latest posts by Ferdie L. Eusebio (see all)