Imahen

‘Di na n’ya kilala ang mukhang kausap at kanyang kaharap

Kasinglabo na rin ng lumang salamin ang matang mapungay;

‘Di na n’ya aninag ang mga imaheng minsan n’yang ginagap.

Maging ang pisngi n’yang maganda’t makinis; pirmi ring bumagsak

Gan’un din ang noong kulubot na batbat ng linyang pahalang;

‘Di na n’ya kilala ang mukhang kausap at kanyang kaharap.

Ganyan ang ligalig na dulot sa isip ng kanyang pag-usad

Sa andar ng oras, ‘di s’ya nakaligtas kahit sinubukan;

‘Di na n’ya aninag ang mga imaheng minsan n’yang ginagap.

Kung kaya palihim ang kanyang pagpahid sa mukha ng makeup

At tina sa ubang bakas na iniwan ng taong nagdaan;

‘Di na n’ya kilala ang mukhang kausap at kanyang kaharap.

Sabay ding inayos ang gusot ng balat sa lotion at sunblock

Upang ‘di mabunyag ang pangit na markang dapat ay lihim lang;

‘Di na n’ya aninag ang mga imaheng minsan n’yang ginagap.

At ito ang lunas sa bagsik ng sumpang kanyang dinaranas

Mapigil n’ya lamang ang nais mangyari ng Poong Maykapal;

‘Di na n’ya kilala ang mukhang kausap at kanyang kaharap

‘Di na n’ya aninag ang mga imaheng minsan n’yang ginagap.

Public Domain Image Old Woman at the Mirror by Bernardo Strozzi

Author
Recent Posts

Ferdie L. Eusebio

Musikero, makata, mangingibig, at driver; si Ferdie Eusebio ay isinilang at nagkukuta sa Los Baños, Laguna. Kasalukuyang online writer para sa sandamakmak na business websites sa loob at labas ng Pilipinas. Siya ang tumatayong Editor ng ExpertContentWritersTeam - isang pangkat ng mga freelance writers. Siya rin ay kasalukuyang taga-pangulo ng KATAGA.

Kamakailan ay nagwagi siya sa dalawang timpalak na kapwa pinasimulan ng Komisyon sa Wikang Filipino (KWF) - Tumula Tayo 2022, kategoryang Tanaga (Ikalawang Gantimpala) at Dula Tayo: Pagsulat ng Dramatikong Monologo (Ikalawang Gantimpala).

Kapag may oras ay muli siyang nagbabalik sa pag-compose ng mga kanta.

Latest posts by Ferdie L. Eusebio (see all)