Kulang Mang Pambayad Itong Aking Tula
Ina’t ama na rin kayong itinuring
Sa loob ng silid-aralang tahanan
Kahit noong ako’y paslit pa’t uhuging
Letra at numero’y unang sinubukan.
Araw ma’y himbing pa sa kanlungang langit,
Kayo ay mulat na upang salubungin
Kaming mga anak sa ibang pag-ibig
At sa pagkatuto kami’y inyong dalhin.
Tulad sa paglakad, mga unang hakbang
Ng buhay kong musmos ay inyong hinubog.
Naroroon kayong sinusubaybayan
Ang aking pagsulong o ang pagkahulog.
Mula sa pagsulat, kahit pagbibilang,
Hanggang sa pagbigkas ng mga salita,
Kayo’y bukas-palad na nagbigay daang
Aking matuklasan ang daang dakila.
Aking napagtanto: nang dahil sa inyo,
Ako’y nagkapapel sa ating lipunan.
Kung di n’yo nagawa ang magsakripisyo,
Di ko masusulat ang aking pangalan.
Hindi ko man kayo napasalamatan
Sa bawat araling inyong inihanda,
Dito, sa ‘king puso, kayo ay may puwang.
Kulang mang pambayad itong aking tula,
Laging tatanawing ‘sang utang na loob
Ang aral na inyong ipinagkaloob.
Disenyo ng larawan: Ferdie L. Eusebio
Kamakailan ay nagwagi siya sa dalawang timpalak na kapwa pinasimulan ng Komisyon sa Wikang Filipino (KWF) - Tumula Tayo 2022, kategoryang Tanaga (Ikalawang Gantimpala) at Dula Tayo: Pagsulat ng Dramatikong Monologo (Ikalawang Gantimpala).
Kapag may oras ay muli siyang nagbabalik sa pag-compose ng mga kanta.
- Eklipse - November 10, 2022
- Kubing* - October 24, 2022
- Sa Aking Rocketship (Isang Haibun) - October 21, 2022