Paghihiwalay

Ang paghihiwalay

Ay parang paggapas sa uhay

Na binungkos-bungkos

Ng mga Dakilang Kamay

At kapag tabas na ang tangkay

Maiiwan ang pinag-ugatan

Upang matuyo’t mabulok

Sa bitak na lupang

Kanilang pinagsamahan

Kagaya din ito

Kung paano nagiging bigas

Ang gintong butil ng palay –

Binabayo, ginigiling

Prosesong uulit-ulitin

Hanggang matambad

Ang munting butil na hubad

Sa pinagbalutang ipa

Wala itong pinag-iba

Sa mainit na kaning

Ating isinubo

Sa pagmamadali

At nang mapaso’y

Iniluwa dagli

Pagkat mainit ang katotohanang

Dumampi sa ating mga labi

At matatanong, sinta:

Alin kaya sa ating dalawa

Ang naging bigas at ipa

Ngayong ‘di na tayo magkasama?

Public Domain image Rice Heart

Ang tulang ito ay bahagi ng koleksyon na pinamagatang “Tilamsik ng Haraya“. Mada-download ng libre ang e-book na ito dito sa aming website.

Author
Recent Posts

Ferdie L. Eusebio

Musikero, makata, mangingibig, at driver; si Ferdie Eusebio ay isinilang at nagkukuta sa Los Baños, Laguna. Kasalukuyang online writer para sa sandamakmak na business websites sa loob at labas ng Pilipinas. Siya ang tumatayong Editor ng ExpertContentWritersTeam - isang pangkat ng mga freelance writers. Naging tagapangulo ng Kataga, Samahan ng mga Manunulat sa Pilipinas, Inc.

Kamakailan ay nagwagi siya sa dalawang timpalak na kapwa pinasimulan ng Komisyon sa Wikang Filipino (KWF) - Tumula Tayo 2022, kategoryang Tanaga (Ikalawang Gantimpala) at Dula Tayo: Pagsulat ng Dramatikong Monologo (Ikalawang Gantimpala).

Kapag may oras ay muli siyang nagbabalik sa pag-compose ng mga kanta.

Latest posts by Ferdie L. Eusebio (see all)