Para Kay Himig
Lumundag kang parang palaka
at kumilos nang malayang malaya.
Umakyat kang tila matsing
at lihim ng gubat ay iyong alamin.
Tumakbo kang parang kabayo
at sumabay sa bilis ng ikot ng mundo.
Lumangoy kang wangis ng butanding
at maglakbay sa hiwaga ng dagat na malalim.
Hayaang lumipad kagaya ng ibon
ang pangarap mo at imahinasyon
Iyo ding tularan ang bunying langgam
na puspos ng sipag ang buong katawan.
Maging mahinahon tulad ng pagong;
lahat ay makakamit sa tamang panahon.
Maging matapat kang katulad ng aso
kaibigan at magiliw sa pamilyang tao.
Iwasang sumama sa mga buwaya
at baka sa kasakiman ikaw ay mamihasa.
Ikaw ay lumayo sa mga hunyango
kulay nila’y huwad at mapagbalatkayo.
Huwag ding tularan ang mga ahas
na nanunuklaw sa nagpapakaing palad.
‘Wag ding pangaraping ika’y maging anay;
sila’y pesteng sumisira sa haligi ng bahay.
Hayop mang kaaway o kaibigang matalik
sa asal at bait, tao ang kahawig
Kung paano mo ituring, ituring ka’y ganun din
kung iyong lilingapin, ikaw di’y lilingapin.
Hayop mang ituring, may taglay silang dunong
kaya pakaisipin, bilin namin ngayon
Bata, sa daigdig, ito ang totoo:
“Madaling maging tao, mahirap magpakatao.”
Image by Ferdie L. Eusebio, “Nanunungkit”
Ang tulang ito ay bahagi ng koleksyon na pinamagatang “Tilamsik ng Haraya“. Mada-download ng libre ang e-book na ito dito sa aming website.
Kasalukuyang online writer para sa sandamakmak na business websites sa loob at labas ng Pilipinas. Siya ang tumatayong Editor ng ExpertContentWritersTeam - isang pangkat ng mga freelance writers. Naging tagapangulo ng Kataga, Samahan ng mga Manunulat sa Pilipinas, Inc.
Nagwagi siya sa dalawang timpalak na kapwa pinasimulan ng Komisyon sa Wikang Filipino (KWF) - Tumula Tayo 2022, kategoryang Tanaga (Ikalawang Gantimpala) at Dula Tayo: Pagsulat ng Dramatikong Monologo (Ikalawang Gantimpala). Muli siyang nagwagi sa mga kategoryang Diyona, Tanaga, at Dalit sa Tula Tayo 2023.
Noong 2024, pitong beses siyang nagwagi sa Tula Tayo (anim na diyona, isang tanaga) sa KWF, at dalawang beses naman sa Saranggola Blog Awards (Unang Karangalan sa Kuwentong Pambata at Ikalawang Karangalan sa Tula).
Samantala, ilan sa kaniyang mga akda ay nalimbag sa Points of Contact ng Philippine Collegian, Palihang Rogelio Sicat: Unang Antolohiya, at Ani Journal, Vol 42 ng Cultural Center of the Philippines.
Kapag may oras ay muli siyang nagbabalik sa pag-compose ng mga kanta.
- Ang K’wento ni T’nalie* - November 15, 2024
- Sa Bubóng ng Pag-asa - November 15, 2024
- Eklipse - November 10, 2022