Pasyong Mahal sa Koronang Tinik
Aba, Ginoong Pandemyang
punumpuno ng disgrasya,
pasakit mo’y sobra-sobra
sa kalusugan at bulsa
ng hikahos na balana.
Itong koronang matinik,
walang katulad ang bagsik,
parang latigo humaplit.
Iwaksi man nang mabilis
laksang hapdi’ng ibabalik.
Ang Hari naming magaling,
sa kapangyariha’y lasing
kayâ inaantok pa rin.
Binihag na ng salarin,
madla pa ang dinidiin.
D’yos por Santong milagroso,
kami po’y namemeligro
sa virus at pulitikong
nagdudulot ng deliryo
sa aligagang publiko.
Mahal na Ina ng Awa,
kami ngayo’y lumuluha
sapagkat itong biyayang
panlaman sa ‘ming sikmura,
kinukupit ng walang’ya.
O Krus na tagapagligtas,
nawa po peste’y lumipas
at korona mo’y ilipat
sa tiwali at sa Hudas
sa ami’y nagpapahirap.
Public Domain Image Jesus Christ God Holy Spirit
Kung nagustuhan mo ang akdang ito, pakape ka naman!
I-click lamang ang button sa ilalim para magpadala ng kape sa manunulat. Kung walang button na lumabas ay magtungo lamang sa aming Shop page.
Kasalukuyang online writer para sa sandamakmak na business websites sa loob at labas ng Pilipinas. Siya ang tumatayong Editor ng ExpertContentWritersTeam - isang pangkat ng mga freelance writers. Naging tagapangulo ng Kataga, Samahan ng mga Manunulat sa Pilipinas, Inc.
Nagwagi siya sa dalawang timpalak na kapwa pinasimulan ng Komisyon sa Wikang Filipino (KWF) - Tumula Tayo 2022, kategoryang Tanaga (Ikalawang Gantimpala) at Dula Tayo: Pagsulat ng Dramatikong Monologo (Ikalawang Gantimpala). Muli siyang nagwagi sa mga kategoryang Diyona, Tanaga, at Dalit sa Tula Tayo 2023.
Noong 2024, pitong beses siyang nagwagi sa Tula Tayo (anim na diyona, isang tanaga) sa KWF, at dalawang beses naman sa Saranggola Blog Awards (Unang Karangalan sa Kuwentong Pambata at Ikalawang Karangalan sa Tula).
Samantala, ilan sa kaniyang mga akda ay nalimbag sa Points of Contact ng Philippine Collegian, Palihang Rogelio Sicat: Unang Antolohiya, at Ani Journal, Vol 42 ng Cultural Center of the Philippines.
Kapag may oras ay muli siyang nagbabalik sa pag-compose ng mga kanta.
- Ang K’wento ni T’nalie* - November 15, 2024
- Sa Bubóng ng Pag-asa - November 15, 2024
- Eklipse - November 10, 2022