Bakunawa

Nilamon ng serpiyente ang buwang

kadluan ng laksa-laksang alaala.

Bolang tanglaw sa gabing mapanglaw

Ay ngayo’y pulang pula. Nababad sa dugo

ang pinaslang na musa sa kalangitan.

Walang natira sa Bathaluman kundi bungo

Na sa halip maluoy ay lalong namukadkad.

Umawit ng ponebre ang mga naulilang tala

habang ang serpiyente’y lalong nandahas.

Wala siyang magawa pagkat siya’y nag-iisa

sa ibabaw ng bangkay ng pinuksang kalaban.

Ngayo’y singlamig ng gabi ang pag-iisa

Na umuuk-ok sa ilalim ng kanyang puso.

Ang serpiyenteng magiting, ‘di kinaya

ang bigat ng kalungkutan – itinutok ang nguso

Sa sariling katawan at nagsimulang kumagat

hanggang maubos pati ang kanyang mukha.

Lumbay ng gabi at mga tala ang namayagpag

Habang nag-aabang sa muling pagsilang ng diyosa

na sa haba ng dilim ay magpapanumbalik ng tanglaw.

Sa mitolohiyang Filipino, ang Bakunawa ay isang higanteng serpiyente, dragon, o buwaya na kumakain ng buwan o araw na siyang dahilan ng eklipse.

Ferdie L. Eusebio

Musikero, makata, mangingibig, at driver; si Ferdie Eusebio ay isinilang at nagkukuta sa Los Baños, Laguna.

Kasalukuyang online writer para sa sandamakmak na business websites sa loob at labas ng Pilipinas. Siya ang tumatayong Editor ng ExpertContentWritersTeam - isang pangkat ng mga freelance writers. Naging tagapangulo ng Kataga, Samahan ng mga Manunulat sa Pilipinas, Inc.

Nagwagi siya sa dalawang timpalak na kapwa pinasimulan ng Komisyon sa Wikang Filipino (KWF) - Tumula Tayo 2022, kategoryang Tanaga (Ikalawang Gantimpala) at Dula Tayo: Pagsulat ng Dramatikong Monologo (Ikalawang Gantimpala). Muli siyang nagwagi sa mga kategoryang Diyona, Tanaga, at Dalit sa Tula Tayo 2023.

Noong 2024, pitong beses siyang nagwagi sa Tula Tayo (anim na diyona, isang tanaga) sa KWF, at dalawang beses naman sa Saranggola Blog Awards (Unang Karangalan sa Kuwentong Pambata at Ikalawang Karangalan sa Tula).

Samantala, ilan sa kaniyang mga akda ay nalimbag sa Points of Contact ng Philippine Collegian, Palihang Rogelio Sicat: Unang Antolohiya, at Ani Journal, Vol 42 ng Cultural Center of the Philippines.

Kapag may oras ay muli siyang nagbabalik sa pag-compose ng mga kanta.

Latest posts by Ferdie L. Eusebio (see all)