Kandila

Libong kandilang nagniningning

sa bawat sulok ng daigdig

ay tulad ng mapanglaw na mga bituin

sa madilim at malamig na papawirin.

Lumuluhang mag-isa

sa nauupos na mitsa

pagkat ang pagliliyab

ng umaandap nilang liwanag

ay malapit nang mapatid.

Ang hindi nila nababatid,

may pag-asang hatid ang kanilang init

sa mga pusong napapanglaw

at sa mundong pagal na sa paggalaw.

At katulad pa rin ng mga bituin;

ang liwanag nitong abang kandila

ay pirming gabay at tanglaw

ng bumababang mga tala

sa madilim at malamig na papawirin.

Ferdie L. Eusebio

Musikero, makata, mangingibig, at driver; si Ferdie Eusebio ay isinilang at nagkukuta sa Los Baños, Laguna.

Kasalukuyang online writer para sa sandamakmak na business websites sa loob at labas ng Pilipinas. Siya ang tumatayong Editor ng ExpertContentWritersTeam - isang pangkat ng mga freelance writers. Naging tagapangulo ng Kataga, Samahan ng mga Manunulat sa Pilipinas, Inc.

Nagwagi siya sa dalawang timpalak na kapwa pinasimulan ng Komisyon sa Wikang Filipino (KWF) - Tumula Tayo 2022, kategoryang Tanaga (Ikalawang Gantimpala) at Dula Tayo: Pagsulat ng Dramatikong Monologo (Ikalawang Gantimpala). Muli siyang nagwagi sa mga kategoryang Diyona, Tanaga, at Dalit sa Tula Tayo 2023.

Noong 2024, pitong beses siyang nagwagi sa Tula Tayo (anim na diyona, isang tanaga) sa KWF, at dalawang beses naman sa Saranggola Blog Awards (Unang Karangalan sa Kuwentong Pambata at Ikalawang Karangalan sa Tula).

Samantala, ilan sa kaniyang mga akda ay nalimbag sa Points of Contact ng Philippine Collegian, Palihang Rogelio Sicat: Unang Antolohiya, at Ani Journal, Vol 42 ng Cultural Center of the Philippines.

Kapag may oras ay muli siyang nagbabalik sa pag-compose ng mga kanta.

Latest posts by Ferdie L. Eusebio (see all)