Rebulto
Kung kaya ko lamang dukutin ang puso,
May isang rebulto akong itatayo.
Rebultong marapat sa mga dakila
At mga bayani ng ating bandila.
Pagkat ang puso ko’y nalinlang ng awit
At mga pangako ng huwad na langit,
Ngayo’y isang bato na ayaw tumibok
Dahil punumpuno ng dusa’t himutok.
At dahil ang dugo ay di dumadaloy,
Ako’y laging manhid sa inyong sitwasyon.
Sa isipan ko rin, kayo’y hindi tanaw
Kaya ang tulad n’yo’y aking nalimutan.
Sa pusong matigas, aking iuukit,
Inyong abang mukha’t dakila n’yong hugis
Nang mundo’y matanto ang tunay n’yong saysay:
Ang lakas ng bayan, kayo ang may bigay.
Kayo ang may gawa ng bawat hininga
Kaya bawat tao ay mayro’ng halaga.
At kung itong puso ay muling pumintig,
Kayo nawa ang s’yang unang makarinig.
At kung kaya ko ring sa dibdib ay hugutin
Ang mga pasaning inyo ring pasanin,
Sa inyong rebulto, aking ilalagda:
“Kung kayo ay wala, wala rin ang bansa.”
Kung nagustuhan mo ang akdang ito, pakape ka naman!
I-click lamang ang button sa ilalim para magpadala ng kape sa manunulat. Kung walang button na lumabas ay magtungo lamang sa aming Shop page.
Kasalukuyang online writer para sa sandamakmak na business websites sa loob at labas ng Pilipinas. Siya ang tumatayong Editor ng ExpertContentWritersTeam - isang pangkat ng mga freelance writers. Naging tagapangulo ng Kataga, Samahan ng mga Manunulat sa Pilipinas, Inc.
Nagwagi siya sa dalawang timpalak na kapwa pinasimulan ng Komisyon sa Wikang Filipino (KWF) - Tumula Tayo 2022, kategoryang Tanaga (Ikalawang Gantimpala) at Dula Tayo: Pagsulat ng Dramatikong Monologo (Ikalawang Gantimpala). Muli siyang nagwagi sa mga kategoryang Diyona, Tanaga, at Dalit sa Tula Tayo 2023.
Noong 2024, pitong beses siyang nagwagi sa Tula Tayo (anim na diyona, isang tanaga) sa KWF, at dalawang beses naman sa Saranggola Blog Awards (Unang Karangalan sa Kuwentong Pambata at Ikalawang Karangalan sa Tula).
Samantala, ilan sa kaniyang mga akda ay nalimbag sa Points of Contact ng Philippine Collegian, Palihang Rogelio Sicat: Unang Antolohiya, at Ani Journal, Vol 42 ng Cultural Center of the Philippines.
Kapag may oras ay muli siyang nagbabalik sa pag-compose ng mga kanta.
- Ang K’wento ni T’nalie* - November 15, 2024
- Sa Bubóng ng Pag-asa - November 15, 2024
- Eklipse - November 10, 2022