Tripulante

Isang malawak na dagat ng pananabik

ang pagitan ng aming barko sa ating baybayin

noong araw na maglayag malapit

sa pampang kung saan ako nanggaling.

Tanaw na tanaw ko rin ang pantalang

lunsaran ng mga barkong pangkalakalang

paris ko’y hanap ang maaliwalas na kapalaran.

Kung maaari lang sanang makisuyo

sa mga ibong sa bintana ko’y nakadapo,

kanina pa ako sumulat ng liham

upang ihatid nila sa mga palad ng aking mag-anak

ang balita ng aming pagdaan sa baybay-dagat.

Isusulat ko ring maayos lang ang aking lagay

at pangako ng masaganang buhay sa muling pagdaong.

Ngunit ang luha ko’t ang dagat

ay parang nagiging magkasing-alat

kapag sa alaala ay muling sumasagi

ang ‘di mapugtong hirap na sa atin ay naghahari.

Kundi lang dahil sa mga utang namin

at iba pang nagtataasang bayarin at bilihin

lulundag na ako sa barkong sinasakyan

at lalangoy pabalik sa bayang pinanggalingan.

At muling lalawak ang dagat ng pananabik

at pagitan ng aming barko sa ating baybayin.

Ferdie L. Eusebio

Musikero, makata, mangingibig, at driver; si Ferdie Eusebio ay isinilang at nagkukuta sa Los Baños, Laguna.

Kasalukuyang online writer para sa sandamakmak na business websites sa loob at labas ng Pilipinas. Siya ang tumatayong Editor ng ExpertContentWritersTeam - isang pangkat ng mga freelance writers. Naging tagapangulo ng Kataga, Samahan ng mga Manunulat sa Pilipinas, Inc.

Nagwagi siya sa dalawang timpalak na kapwa pinasimulan ng Komisyon sa Wikang Filipino (KWF) - Tumula Tayo 2022, kategoryang Tanaga (Ikalawang Gantimpala) at Dula Tayo: Pagsulat ng Dramatikong Monologo (Ikalawang Gantimpala). Muli siyang nagwagi sa mga kategoryang Diyona, Tanaga, at Dalit sa Tula Tayo 2023.

Noong 2024, pitong beses siyang nagwagi sa Tula Tayo (anim na diyona, isang tanaga) sa KWF, at dalawang beses naman sa Saranggola Blog Awards (Unang Karangalan sa Kuwentong Pambata at Ikalawang Karangalan sa Tula).

Samantala, ilan sa kaniyang mga akda ay nalimbag sa Points of Contact ng Philippine Collegian, Palihang Rogelio Sicat: Unang Antolohiya, at Ani Journal, Vol 42 ng Cultural Center of the Philippines.

Kapag may oras ay muli siyang nagbabalik sa pag-compose ng mga kanta.

Latest posts by Ferdie L. Eusebio (see all)