Ang K’wento N’ya
Lagi’t laging mayro’ng pasa ang maamo niyang mukha
Pagkatapos s’yang awayin ng kaklase’t kapwa bata
Ganyan lagi ang k’wento n’ya; ‘di lang natin mahalata
Pagkat laging nakangiti kahit takot, nahihiya.
Binansagang aswang, kapre, tiyanak at ‘sang maligno
Tinawag ding bansot, ampon, payatot at kabonegro.
May palayaw ding mataba na ‘singlaki ng ‘sang lobo
Ganyan lagi ang k’wento n’ya, ‘pag kaklase’y nanunukso.
Ganyan lagi ang k’wento n’ya; walang sawa, walang puknat
Araw-araw sa ‘skwelahan mata’y mugto sa pag-iyak
Ganyan lagi ang k’wento n’ya; hiling niya, “sana bukas
Kapalara’y magbago na, k’wentong ito ay magwakas.”
Ang hindi mo nalalaman, ang k’wento n’ya’y k’wento mo rin
‘Pag hindi mo itinigil, sa iyo rin ay gagawin
Mayro’ng isang kasabihang dapat nating seryosohin:
“Kung ano ang itinanim, siya rin ang aanihin.”
Public Domain Image Gulls Fun Photo Composing
Kasalukuyang online writer para sa sandamakmak na business websites sa loob at labas ng Pilipinas. Siya ang tumatayong Editor ng ExpertContentWritersTeam - isang pangkat ng mga freelance writers. Naging tagapangulo ng Kataga, Samahan ng mga Manunulat sa Pilipinas, Inc.
Nagwagi siya sa dalawang timpalak na kapwa pinasimulan ng Komisyon sa Wikang Filipino (KWF) - Tumula Tayo 2022, kategoryang Tanaga (Ikalawang Gantimpala) at Dula Tayo: Pagsulat ng Dramatikong Monologo (Ikalawang Gantimpala). Muli siyang nagwagi sa mga kategoryang Diyona, Tanaga, at Dalit sa Tula Tayo 2023.
Noong 2024, pitong beses siyang nagwagi sa Tula Tayo (anim na diyona, isang tanaga) sa KWF, at dalawang beses naman sa Saranggola Blog Awards (Unang Karangalan sa Kuwentong Pambata at Ikalawang Karangalan sa Tula).
Samantala, ilan sa kaniyang mga akda ay nalimbag sa Points of Contact ng Philippine Collegian, Palihang Rogelio Sicat: Unang Antolohiya, at Ani Journal, Vol 42 ng Cultural Center of the Philippines.
Kapag may oras ay muli siyang nagbabalik sa pag-compose ng mga kanta.
- Ang K’wento ni T’nalie* - November 15, 2024
- Sa Bubóng ng Pag-asa - November 15, 2024
- Eklipse - November 10, 2022