Ang Palaboy

Siya’y palaboy, walang mapuntahan

Walang pamilya o tahanan

Naghahanap, nangungulila

Sa pagmamahal at pagkalinga

Nakatingala sa mga dumaraan

Sa pagtingin, gutom ba’y nababawasan?

Naiibsan ba ang sugat at sakit

Ng kawalang-pakialam at panlalait?

Kumakalam ang kanyang sikmura

Sa gutom na hindi humuhupa

Patuloy lang ba siyang daraanan

Hanggang dumating ang kamatayan?

Sa kanyang panaghoy, walang nakakarinig

Sa kanyang mga luha, walang naaantig

Ang mga tao ba’y sadyang ‘di naaawa?

Sa pagtulong ba’y walang pagkusa?

Siya’y palaboy, walang mapuntahan

Walang tiyak na patutunguhan

Sino nga naman ang magkakalinga

Sa tulad niyang isa lamang pusa?

Author
Recent Posts

Jairene Calabia Cruz-Eusebio

Anumang pangarap ay maaaring matupad— ‘Yan ang paniniwala ni Jaymee a.k.a. Jairene. Pagsusulat at pagbabasa ang paborito niyang gawin (bukod pa sa panonood ng mga series at anime at paglalaro ng video games kapag hindi nakatingin si Himig).

Swerte siyang nanalo sa Carlos Palanca Memorial Awards for Literature noong 2013, 2017 at 2018.

I am a part of God, and God is a part of me. I am divine; always will be.— Jairene CCE

Follow me at Instagram @jairene01

Latest posts by Jairene Calabia Cruz-Eusebio (see all)