Flores de Mayo
Sa isang munting parada ng mga bulaklak,
ikaw ay natatangi sa ganda at busilak
Na marahang pumaparada sa mga mata
ng mga debotong naglalakad sa kalsada.
Di ko alam kung sinong mas matimtiman;
ang banal na birhen sa prusisyon o ikaw
Na nagsasabog ng halimuyak at yumi
sa umaasang puso at nag-aabang na labi?
Ang mga dasal na ating inuusal at inaawit
ay harana ng balana sa natutuyong bukid
Habang ang mga awit at dasal na aking inuusal
ay munting harana ng pagsintang sa’yo lamang.
Samo’t dalangin ko: ‘wag sanang magwakas
ang mabining pag-usad ng paradang makupad
Pagkat ako’y nahuhumaling sa tinig mong malambing
na ‘di lang ako ang nahuhulog, kundi pati mga bituin.
Kaya kapag humikbi na ang mahabaging langit
at tumulo ang luha ng tuwa sa tumanang nananabik
Muling magsisibulan ang mga bulaklak ng pag-asa
na siyang iaalay ko sa munti nating altar at dambana.
Public Domain Image Flores De Mayo Ilocos
Kasalukuyang online writer para sa sandamakmak na business websites sa loob at labas ng Pilipinas. Siya ang tumatayong Editor ng ExpertContentWritersTeam - isang pangkat ng mga freelance writers. Naging tagapangulo ng Kataga, Samahan ng mga Manunulat sa Pilipinas, Inc.
Nagwagi siya sa dalawang timpalak na kapwa pinasimulan ng Komisyon sa Wikang Filipino (KWF) - Tumula Tayo 2022, kategoryang Tanaga (Ikalawang Gantimpala) at Dula Tayo: Pagsulat ng Dramatikong Monologo (Ikalawang Gantimpala). Muli siyang nagwagi sa mga kategoryang Diyona, Tanaga, at Dalit sa Tula Tayo 2023.
Noong 2024, pitong beses siyang nagwagi sa Tula Tayo (anim na diyona, isang tanaga) sa KWF, at dalawang beses naman sa Saranggola Blog Awards (Unang Karangalan sa Kuwentong Pambata at Ikalawang Karangalan sa Tula).
Samantala, ilan sa kaniyang mga akda ay nalimbag sa Points of Contact ng Philippine Collegian, Palihang Rogelio Sicat: Unang Antolohiya, at Ani Journal, Vol 42 ng Cultural Center of the Philippines.
Kapag may oras ay muli siyang nagbabalik sa pag-compose ng mga kanta.
- Ang K’wento ni T’nalie* - November 15, 2024
- Sa Bubóng ng Pag-asa - November 15, 2024
- Eklipse - November 10, 2022