Kahon Kahon

Kahon-kahong pasalubong

Ang dumating kanina lang;

Laman nito ay pantalon

Mga damit at laruan.

Kahon-kahon ding de-lata

Mga kendi, tsokolate

May kalakip din na pera

Para kina kuya’t ate.

Kahon-kahong mga sabon

Kolorete at pabango

‘Di mabilang sa maghapon

O kahit pa isang linggo.

Kahon-kahon nang dumating

Ang imported na ligaya

Ang naiwang liligpitin:

Kahon-kahon ding basura.

II.

Kahon-kahong mga karton

Ang masinop na pinulot

Ng mag-anak na palaboy

Sa basurang mala-bundok.

Kahon-kahon ang laruan

Nina totoy at ni nene

Kahon-kahon ding kalakal

Na kapalit ay salapi.

Kahon-kahong tagni-tagni

Ang tirahan sa may silong

Ng matayog na gusali

Sa labas ng subdivision.

Kahon-kahong mga kalat

Ang naiwang pasalubong

Ng pamilyang nakatanggap

Sa pamilyang nagugutom.

Ferdie L. Eusebio

Musikero, makata, mangingibig, at driver; si Ferdie Eusebio ay isinilang at nagkukuta sa Los Baños, Laguna. Kasalukuyang online writer para sa sandamakmak na business websites sa loob at labas ng Pilipinas. Siya ang tumatayong Editor ng ExpertContentWritersTeam - isang pangkat ng mga freelance writers. Naging tagapangulo ng Kataga, Samahan ng mga Manunulat sa Pilipinas, Inc.

Kamakailan ay nagwagi siya sa dalawang timpalak na kapwa pinasimulan ng Komisyon sa Wikang Filipino (KWF) - Tumula Tayo 2022, kategoryang Tanaga (Ikalawang Gantimpala) at Dula Tayo: Pagsulat ng Dramatikong Monologo (Ikalawang Gantimpala).

Kapag may oras ay muli siyang nagbabalik sa pag-compose ng mga kanta.

Latest posts by Ferdie L. Eusebio (see all)