Sa Habang Panahon

Tulad mo’y bulaklak sa gitna ng hardin

na dagling pinitas matapos mapansin

Subalit sa halip na ika’y samyuhin –

kinuyom sa kamay; pinigang mariin.

Naiwan kang sira; talulot mo’y lagas,

ang hardi’y nalunod sa luha mong katas.

Umihip ding sunod ang hanging malakas

at ika’y napadpad sa lupang marahas.

Sa halip maluoy at saka mabulok,

ikaw ay nagbangon sa pagkakayupyop.

At doon sa lusak ng pagkakalugmok

samyo ng pag-asa ay iyong tinampok.

Sa iyong talulot bumukal, sumibol

ang mga bulaklak na magpapatuloy

sa pamamayagpag ‘di lang buong taon:

hahalimuyak din sa habang panahon.

Ferdie L. Eusebio

Musikero, makata, mangingibig, at driver; si Ferdie Eusebio ay isinilang at nagkukuta sa Los Baños, Laguna.

Kasalukuyang online writer para sa sandamakmak na business websites sa loob at labas ng Pilipinas. Siya ang tumatayong Editor ng ExpertContentWritersTeam - isang pangkat ng mga freelance writers. Naging tagapangulo ng Kataga, Samahan ng mga Manunulat sa Pilipinas, Inc.

Nagwagi siya sa dalawang timpalak na kapwa pinasimulan ng Komisyon sa Wikang Filipino (KWF) - Tumula Tayo 2022, kategoryang Tanaga (Ikalawang Gantimpala) at Dula Tayo: Pagsulat ng Dramatikong Monologo (Ikalawang Gantimpala). Muli siyang nagwagi sa mga kategoryang Diyona, Tanaga, at Dalit sa Tula Tayo 2023.

Noong 2024, pitong beses siyang nagwagi sa Tula Tayo (anim na diyona, isang tanaga) sa KWF, at dalawang beses naman sa Saranggola Blog Awards (Unang Karangalan sa Kuwentong Pambata at Ikalawang Karangalan sa Tula).

Samantala, ilan sa kaniyang mga akda ay nalimbag sa Points of Contact ng Philippine Collegian, Palihang Rogelio Sicat: Unang Antolohiya, at Ani Journal, Vol 42 ng Cultural Center of the Philippines.

Kapag may oras ay muli siyang nagbabalik sa pag-compose ng mga kanta.

Latest posts by Ferdie L. Eusebio (see all)