Sa Tuwing Sasakmalin Ng Dilim Ang Bukirin

At sumasalakay sila sa karimlan ng gabi.

Pusikit pang nababalot ng dilim ang bukirin

Tuwing sila’y dumarating, walang abiso o pasabi.

Tila mga anay silang humahanay sa bawat baging,

Tangkay, dahon at bunga – matiyagang naghuhukay,

Naghuhukay nang naghuhukay sa pakay na kunin.

Kapag pumupulandit naman ang ilaw sa kalayuan

Sila ay magsisidapaan na para bang mga ahas;

Gagapang sa sukal upang hindi sila matanaw

Ng sinumang sa gabi ay nagmamatyag.

Ayaw na ayaw nilang may sinumang makasisilip

Ng kanilang tunay na anyo. Baka nga malantad

Sa buong lupain ang hitsura nilang marungis.

Kaya sila ay nananalangin kahit nagkakasala

Na huwag sanang madapuan ng mabangis na titig.

At kapag tapos na, ititindig nilang parang bandila

Ang mga tangkay na kinunan ng bungang-lupang pinuti;

Gagawin nila ito upang ang mga bakas ay ‘di mahalata.

At sumasalakay sila sa karimlan ng gabi

Habang himbing na himbing ang may-ari ng bukiring

Pinagnanakawan na ay hindi pa masabi.

Ferdie L. Eusebio

Musikero, makata, mangingibig, at driver; si Ferdie Eusebio ay isinilang at nagkukuta sa Los Baños, Laguna.

Kasalukuyang online writer para sa sandamakmak na business websites sa loob at labas ng Pilipinas. Siya ang tumatayong Editor ng ExpertContentWritersTeam - isang pangkat ng mga freelance writers. Naging tagapangulo ng Kataga, Samahan ng mga Manunulat sa Pilipinas, Inc.

Nagwagi siya sa dalawang timpalak na kapwa pinasimulan ng Komisyon sa Wikang Filipino (KWF) - Tumula Tayo 2022, kategoryang Tanaga (Ikalawang Gantimpala) at Dula Tayo: Pagsulat ng Dramatikong Monologo (Ikalawang Gantimpala). Muli siyang nagwagi sa mga kategoryang Diyona, Tanaga, at Dalit sa Tula Tayo 2023.

Noong 2024, pitong beses siyang nagwagi sa Tula Tayo (anim na diyona, isang tanaga) sa KWF, at dalawang beses naman sa Saranggola Blog Awards (Unang Karangalan sa Kuwentong Pambata at Ikalawang Karangalan sa Tula).

Samantala, ilan sa kaniyang mga akda ay nalimbag sa Points of Contact ng Philippine Collegian, Palihang Rogelio Sicat: Unang Antolohiya, at Ani Journal, Vol 42 ng Cultural Center of the Philippines.

Kapag may oras ay muli siyang nagbabalik sa pag-compose ng mga kanta.

Latest posts by Ferdie L. Eusebio (see all)